Больш за 570 тыс. еўра было сабрана на падтрымку палітзняволеных падчас і пасля анлайн-марафону «Нам не ўсё адно». Падчас марафону дапамогу палітвязням аказала больш за 9 тыс. чалавек. Самы буйны данат склаў 10 тыс. еўра.
Удзельнікам марафону падзякавала лідэрка дэмакратычных сіл Святлана Ціханоўская. «Я не магу не сказаць словы падзякі кожнаму, хто далучыўся да гэтага марафону. Калі я бачыла, як хутка бягуць данаты, то за кожным данатам я бачыла і адчувала чалавека, яго добрае, неабыякавае сэрца. Ведайце, нам ёсць чым ганарыцца — ганарыцца адно адным. Дзякуй вам вялікі», — сказала яна ў відэазвароце.
Нагадаем, больш за 20 незалежных медыяў аб’ядналіся ў 12-гадзінным анлайн-марафоне 29 ліпеня, каб сабраць сродкі на падтрымку беларускіх палітвязняў. Трансляцыя вялася адначасова на шматлікіх незалежных YouTube-пляцоўках з 10-й ранку да 10-й вечара па мінскім часе. Збор сродкаў ажыццяўляўся таксама і на наступны дзень.
З ініцыятывай выступіла прадстаўніца па сацыяльнай палітыцы Аб’яднанага пераходнага кабінета Беларусі Вольга Гарбунова са сваёй камандай. У арганізацыі і правядзенні марафону ўдзельнічала больш за 20 незалежных медыяў, сярод якіх Белсат TV, Еўрарадыё, Зеркало, Звычайны ранак, Радыё Свабода, Радыё Ўнэт, Страна для жизни, а таксама Беларускі расследавальніцкі цэнтр, Брестская газета, Маланка Медиа, Медыязона, Наша Ніва, Радыё Рацыя, Салідарнасць, BPN/Pozirk, Hrodna.life, Kyky.org, Nexta, Reform.by, Tribuna.com і многія іншыя.
Данаты будуць размеркаваныя паміж фондамі, ініцыятывамі і арганізацыямі, якія дапамагаюць палітзняволеным і іх родным. Кантраляваць размеркаванне сабраных грошай будзе спецыяльна створаная назіральная рада, у якую ўвойдуць прадстаўнікі медыя-арганізатараў марафону.
