Расказваем, як гродзенскі гісторыка-патрыятычны клуб «Аркона» стаў прыкрыццём для «інфаспецназаўкі» Вольгі Бондаравай і «чырвоных казакоў», цесна звязаных з «русским миром».
Усё змяніў 2020 год
Ад 2011 года ў Гродне існуе гісторыка-патрыятычны клуб «Аркона». Цягам дзесяці гадоў, да 2021 года, ім кіраваў трэнер з айкідо Міхаіл Мікалаеў, а трэніравалі дзяцей разам з ім памежнікі Гродзенскай памежнай групы. Усё змянілася ў другой палове 2020 года. Міхаіл Мікалаеў пакінуў «Аркону» і, судзячы з усяго, з ягоным адыходам клуб спыніў трэнаванне дзяцей. А новымі кіраўнікамі клуба сталі Дзмітры Варанцоў ды ягоная намесніца вядомая «інфаспецназаўка» Вольга Бондарава.
І ў тым жа 2020 годзе, у верасні, з’явілася старонка клубу «Аркона» ў сацсетцы «ВКонтакте», зместам якой с самога пачатку сталі перапосты розных дзеячоў «русского мира».
Вельмі імаверна, што апісаныя вышэй змены былі звязаныя з рэакцыяй прарасейскіх сілаў на масавыя пратэсты 2020 года.
Паводле справаздачаў аб дзейнасці «Арконы» за 2020 і 2021 годы, якія падаваліся ва ўпраўленне юстыцыі Гродзенскага аблвыканкама, напрамкамі дзейнасьці клуба пасля змены кіраўніцтва сталі: па-першае, удзел у праўладных мітынгах і, па-другое, удзел у мерапрыемствах, у якіх задзейнічаныя дзеці, з мэтай распаўсюду расійскай «версіі» гісторыі і сучаснасці Беларусі.
Абедзве згаданыя справаздачы падпісаныя Дзмітрыем Варанцовым у якасці старшыні клуба «Аркона».
Бондарава працуе ў абласным цэнтры турызму і краязнаўства?
У справаздачы за 2021 год пад нумарам шэсць стаіць мерапрыемства пад назвай «Экскурсія для вучняў гімназіі № 10 г. Гродна ў 6 АМБР». У акаўнце Дзмітрыя Варанцова ў сацсетцы «ВКонтакте» ёсць здымак, зроблены падчас экскурсіі, на якім бачныя Дзмітры Варанцоў і Вольга Бондарава. Яны стаяць ля будынку музея баявой славы 6-ай механізаванай брыгады. Паводле архіва навінаў на старонцы гімназіі №10, такая экскурсія сапраўды адбылася, але сказана, што яе праводзілі супрацоўнікі Гродзенскага абласнога цэнтра турызму і краязнаўства. На старонцы цэнтра турызму і краязнаўства таксама ёсць згадка пра гэтую экскурсію, і пацверджана, што яе арганізоўвала менавіта гэтая ўстанова.
Такім чынам, можна лічыць, што на той момант Дзмітры Варанцоў і Вольга Бондарава былі, а мо і зараз ёсць, супрацоўнікамі Гродзенскага абласнога цэнтра турызму і краязнаўства, які падпарадкоўваецца Галоўнаму ўпраўленню адукацыі Гродзенскага аблвыканкама.
Дарэчы, часам Бондарава падпісвала звароты не як намесніца, а як выконваючая абавязкі старшыні клуба «Аркона». Напрыклад, так яна падпісалася пад зваротам супроць прысваення Астравецкай бібліятэцы імені Адама Мальдзіса.
Сувязі з Расіяй
І Дзмітры Варанцоў, і ягоная намесніца Вольга Бондарава з’яўляюцца чальцамі Камуністычнай партыі Беларусі. Як высветлілася, Дзмітры Варанцоў узначальвае «Беларускі казачы рух чырвоных казакоў імя маршала Будзёнага», які ёсць часткай створанага ў Расіі «Міжнароднага саюзу чырвоных казакоў». Паводле тэксту прысягі беларускіх «чырвоных казакоў», яны абавязуюцца «абараняць гісторыю СССР», а таксама «абараняць ад хлусьні і паклёпа Леніна і Сталіна».
Яшчэ адным актывістам сучаснай «Арконы» з’яўляецца Аркадзь Гартунг, чалец «Рэспубліканскай партыі труда і справядлівасці», якая падтрымлівае цесныя сувязі з расійскай партыяй «Справедливая Россия». Разам з Дзмітрыем Варанцовым Аркадзь Гартунг уваходзіць у склад «чырвоных казакоў».
Апрача гэтага, ён з’яўляецца старшынёй праўлення зарэгістраванага у тым жа 2020 годзе грамадскага аб’яднаньня «Таварыства Элізы Літвінкі». Першым жа публічным мерапрыемствам навастворанага таварыства стаў удзел у мітынгу ў падтрымку Лукашэнкі ў жніўні 2020 года. І дзеля гэтага Аркадзю Гартунгу, як бачна, патрабавалася прыкрыцца імем Элізы Ажэшкі.
