На сайце польскага ўрада запусцілі раздзел па-беларуску. Ён даступны па адрасе https://www.gov.pl/web/by/
«Інтэрнэт-старонка для грамадзян Беларусі была падрыхтавана для асоб, якія вырашылі легальна знаходзіцца ў Польшчы і маюць патрэбу ў зразумелай, дакладнай інфармацыі адносна жыцця ў нашай краіне. Тут Вы знойдзеце карысныя парады наконт афіцыйных фармальнасцей, доступу да выплат, магчымасцей працаўладкавання, вядзення гаспадарчай дзейнасці ці адукацыі дзяцей. Увесь апублікаваны змест мае афіцыйны характар і быў падрыхтаваны на падставе дзеючых прававых нормаў, а таксама інфармацыі, прадастаўленай польскімі дзяржаўнымі ўстановамі. Наша мэта — палягчэнне штодзённага функцыянавання і інтэграцыі грамадзян Беларусі ў Польшчы», — паведамляецца на сайце.
На сайце можна знайсці, напрыклад, інфармацыю пра абмен пасведчання кіроўцы, нумар PESEL, сямейныя выплаты і пенсію.
Як паведамілі ў Аб’яднаным пераходным кабінеце, намеснік кіраўніцы якога Павел Латушка выступіў з ініцыятывай стварыць сэрвіс, паводле дамоўленасці з Урадавым інфармацыйным цэнтрам Польшчы плануецца штоквартальнае абнаўленне карыснай для беларусаў інфармацыі.
Вы можаце абмеркаваць гэты матэрыял у нашым Telegram-канале. Калі вы не ў Беларусі, пераходзьце і падпісвайцеся.
