Да фестывалю абуджаных TUTAKA засталося менш за месяц — мерапрыемствы пройдуць з 10 па 13 ліпеня. Як і ў мінулыя гады, беларусы з розных краін свету сустрэнуцца ў мястэчку Гарадок (Gródek), што ў 30 кіламетрах ад Беластока. MOST паразмаўляў з арганізатарам TUTAKA Паўлам Станкевічам і сабраў адказы на самыя галоўныя пытанні пра фестываль.
Ці трэба плаціць?
Уваход на фестываль па-ранейшаму застаецца бясплатным — ніякіх квіткоў набываць не трэба. Арганізатары заахвочваюць беларусаў скарыстацца гэтай магчымасцю, бо ёсць верагоднасць, што ўжо наступная TUTAKA будзе платнай.
Хто выступіць на TUTAKA-2025
У гэтым годзе ў фарміраванні лайн-апа ўпершыню ўдзельнічалі патэнцыйныя гледачы. Апытанку правялі сярод падпісчыкаў у Instagram. У выніку на галоўнай сцэне TUTAKA выступяць:
11 ліпеня
- Mandzik
- Ilo&Friends
- «Дай дарогу»
12 ліпеня
- Spievy z-pad mosta
- ILI-ILI
- Dzieciuki
- Krambambula
13 ліпеня
- Arhedelic
- Maxim i Oliczka
- NaviBand
Асобную пляцоўку арганізоўвае Беластоцкі музычны клуб. На ёй у розныя дні выступяць Кацярына Ваданосава, Аляксандр Памідораў, гурт Kurwadziki, франтмэнт групы Dzieciuki — Dzyadzen’ka.
Выступленні на вялікай сцэне ўпершыню будуць адбывацца тры дні запар. У папярэднія гады хэдлайнеры выступалі цягам двух дзён.
— Дыскусійныя і адукацыйныя пляцоўкі таксама будуць працаваць тры дні. Будзем абмяркоўваць культуру, палітыку і — што важна асабіста мне — жыццё і прысутнасць беларускай меншасці на Падляшшы, — анансуе Павел Станкевіч.
Як дабрацца да фестывалю
TUTAKA адбудзецца ў мястэчку Гарадок — гэта ў 30 кіламетрах ад Беластока. Дабрацца з Беластока можна аўтобусам, які ад’язджае з мясцовага вакзала. Яшчэ адзін варыянт — цягнік, выходзіць трэба на станцыі Валілы (Waliły).
Для ўладальнікаў аўто арганізатары прадугледзяць стаянку. Павел Станкевіч просіць наведвальнікаў фестывалю не пакідаць машыны ўздоўж дарог.
— Каб усім было зручна, мы дамовіліся, каб побач з запраўкай [непадалёк ад месца правядзення фэсту] была вялізарная паркоўка.
Дзе паесці і паспаць?
На TUTAKA-2025 пашыраецца не толькі музычная праграма. Плошчу аднаго з кемпінгаў павялічаць амаль напалову. Месца на намётавым полі будзе каштаваць 24 еўра, калі аплачваць яго перад пачаткам фестывалю, і 30 еўра — падчас фэсту. На тэрыторыі кемпінга ўсталююць біяпрыбіральні і душавыя кабінкі.
У Гарадку і мястэчку Міхалова таксама ёсць аграсядзібы, дзе можна застацца на ноч.
На сёлетнім фестывалі будзе некалькі пунктаў з ежай. Чакаюць фудтракі з бургерамі і блінамі. На суботу, 12 ліпеня, арганізатары запланавалі спаборніцтва па драніках.
— Мы хочам запрасіць вясковых гаспадынь і нарэшце вырашыць спрадвечную спрэчку: якія дранікі лепшыя — з мукой ці без. Гаспадыні будуць прадаваць два віды дранікаў, а пасля падлічым — якіх прадалося больш.
Чаму варта наведаць фестываль?
— Музыка — гэта толькі частка праграмы. Канешне, мы намагаемся зрабіць цікавую сцэну. Але перадусім TUTAKA — гэта сустрэча для беларусаў, — лічыць Станкевіч.
Ён адзначае, што фестываль ужо даўно выйшаў за межы Польшчы. На TUTAKA з’язджаюцца беларусы Літвы, Грузіі, Іспаніі, Англіі і ЗША. Сярод наведвальнікаў ёсць і тыя, хто прыязджае з Беларусі.
— Нас раскідала па ўсім свеце. Таму наша галоўная мэта ў тым, каб беларусы маглі сустрэцца і кайфануць адзін ад аднаго. Таксама гэта магчымасць убачыць, як можна будаваць сучаснае грамадства. Паспрачацца, паслухаць, што кажуць іншыя, парэфлексаваць — і вярнуцца дадому з новымі думкамі.
Карысныя спасылкі
Сачыць за навінамі фестывалю можна:
– на афіцыйным сайце TUTAKA — арганізатары рэгулярна абнаўляюць інфармацыю і дадаюць новыя карысныя спасылкі.
– у Instagram TUTAKA.
Вы можаце абмеркаваць гэты матэрыял у нашым Telegram-канале. Калі вы не ў Беларусі, пераходзьце і падпісвайцеся.
