Гарадская рада Варшавы абвесціла ганаровымі грамадзянамі польскай сталіцы пяць чалавек, у тым ліку зняволенага дзеяча Саюза палякаў у Беларусі Анджэя Пачобута, паведамляюць польскія медыі. Абвяшчэнне ўручэнне адзнак ганаровых грамадзянаў адбылося падчас ўрачыстай сесіі, якая пачалася 31 ліпеня ў Вялікай залі Варшаўскай Палітэхнікі.
Згодна з традыцыяй, тытул ганаровага грамадзяніна сталіцы варшаўскія радныя надаюць на сесіі ў пярэдадзень гадавіны Варшаўскага паўстання. Сёлета, акрамя Пачобута, ганаровымі грамадзянамі Варшавы былі прызнаныя чацвёра паўстанцаў – Барбара Ганцарчык, Анна Ступніцка-Бандо, Збігнеў Рыльскі і Стэфан Месснер.
Як паведамляе карэспандэнт TOK FM, абвяшчэнне Анджэя Пачобута ганаровым грамадзянінам прысутныя прынялі з авацыямі стоячы. Яго родныя, якія жывуць у Беларусі, не прыбылі на сесію з меркаванняў бяспекі.
Анджэй Пачобут быў арыштаваны 25 сакавіка 2021 года. Праз два гады гродзенскаму журналісту прысудзілі 8 гадоў калоніі. Яго вінавацілі ў «распальванні варожасці» і «закліку да санкцый». Польшча ўвесь час дамагаецца ад рэжыму Лукашэнкі вызвалення Пачобута.
