Беларус Цімур Асманаў [імя і прозвішча зменена — заўв. рэд. MOST] прывык жыць на прыродзе: у хлопца было «вясковае» дзяцінства. У Беларусі ён удзельнічаў у розных валанцёрскіх і адзіночных вылазках, археалагічных экспедыцыях і паходах з сябрамі. MOST паразмаўляў з беларусам і даведаўся, як падрыхтавацца да паходу ў лес і, што трэба ведаць, каб застацца жывым.
Вывучыць мясцовасць, падабраць рыштунак, прадумаць харчаванне
Цімур расказвае, што трэба вельмі падтрыхтавацца да пахода ў лес з начоўкай. Адзіночны паход у лес з начоўкай, асабліва калі гэта адбываецца далёка ад населеных пунктаў, патрабуе сур’ёзнага турыстычнага досведу. А яшчэ — мінімальнага набору рэчаў (намёт, спальнік, крыніца агню і г.д.) і фізічнай падтрыхтоўкі.
— Па-першае, да пахода трэба найсці адказнага чалавека, які цябе падстрахуе і падніме паніку, калі ты сваечасова не выйдзеш на сувязь і не вернешся дадому. Па-другое — трэба вывучыць мясцовасць, куды збіраешся ісці. Паглядзець карты, запомніць, якія вадаёмы і населеныя пункты ёсць паблізу, адзначыць, якія яшчэ ёсць арыентыры. Папяровую карту, увогуле, ідэальна мець з сабой. Абавязкова трэба паглядзець прагноз надвор’я. Падабраць рыштунак, вопратку ў адпаведнасці з задачамі. Прадумаць харчаванне з запасам, пітво, медыцына, сродкі сувязі і самааброны. Нюансаў шмат, не адна кніга напісана ўжо, тут я пералічыў толькі самую базу.
Цімур кажа, што ўсё гэта — цэлая навука. Яшчэ ў Беларусі хлопец дапамагаў з пошукам людзей, якія ў вялікіх колькасцях губляюцца ў лесе. Беларус дадае, што «абсалютнай большасці такіх выпадкаў можна было б пазбегнуць, каб людзі ведалі хаця б элементарныя рэчы ў галіне турызма і выжывання».
Што датычыцца неабходных рэчаў, то самае галоўнае па меркаванні Цімура — гэта баланс, а таксама «не цягнуць лішнія кілаграмы і, пры гэтым, не цярпець ад адсутнасці чагосьці неабходнага».
Цімур бы ўзяў у паход з начоўкай наступныя рэчы:
- Нож;
- Сякерка;
- Намёт;
- Спальнік;
- Турыстычны дыванок;
- Тэрмабялізна;
- Металічны кубак;
- Ежу і ваду;
- Тэлефон і павэрбанк;
- Газавы балончык;
- Ракетніцу;
- Аптэчку;
- Запальнічкі;
- Сродкі ад казурак.
«Відэлец ці лыжку можна выразаць з дрэва»
Цімур ужо даўно цікавіцца турызмам і выжываннем, таму да збору рэчаў ставіцца адказна. Выпадкаў, калі пад рукой не аказвалася вельмі важнай рэчы, не было. Таксама беларус лічыць, што досвед — рэч больш карысная, чым рыштунак.
— Калі чагосьці і не хапае — заўсёды можна сымправізаваць. Відэлец ці лыжку заўсёды можна выразаць з дрэва, з пластыкавай бутэлькі можна зрабіць і кубак, і рукамыйнік, і нітку, і ,халера ведае, колькі яшчэ карыснага. Тэнт, часам, нічым не горш за намёт, але нашмат лягчэй. На печцы-шчэпачніцы — ролю якой, дарэчы, можа выканаць і простая бляшанка — гатаваць бывае нават прасцей, чым на вогнішчы.
Цяпер Цімур жыве ў Польшчы: у 2022 годзе быў вымушаны з’ехаць з Беларусі з-за крымінальнага пераследу. Тут «глабальных турыстычных вылазак» у беларуса пакуль не было: новая краіна, новая культура, пошукі працы, жытла і «акліматызацыя».
— Тут не да паходаў. Таму летам і восенню ў 2022 годзе нікуды не выбіраўся. Ну, як нікуды… Аблазіў, вядома, большасць гарадскіх паркаў, з першага заробку набыў сабе ровар, пачаў выязджаць троху за горад. Ну і наведаў некалькі бліжэйшых і не дужа гарадоў. Вось і ўсё. Багата планаў на гэты сезон, у ідэале — наведаць горы і мора.
