Перайменаванне часткі вуліцы Электрычнай у Беластоку, дзе месціцца беларускае консульства, у вуліцу Вольнай Беларусі прайшло з парушэннямі. Пра гэта паведамляе TVP3 Bialystok.
Ваяводскі адміністрацыйны суд у Беластоку адмяніў пастанову гарадскіх уладаў аб перайменаванні часткі вуліцы Электрычнай у вуліцу Вольнай Беларусі. Суд вырашыў, што перайменаванне адбылося пры парушэнні закону.
Суд абвясціў, што рашэнне ўлад Беластоку аб перайменаванні несапраўднае. Яно было прынятае ў верасні 2022 года. Прысуд ваяводскага суда пакуль не ўступіў у законную сілу.
Вядома, што рашэнне абскардзіла адна з мясцовых жыхарак на гэтай вуліцы. Таксама больш за 60 жыхароў з дамоў, якія стаяць на вуліцы, падпісалі пратэст да гарадскіх уладаў.
MOST пісаў, што мясцовыя жыхары скардзіліся, што аб рашэнні перайменаваць вуліцу ў іх не запыталіся мясцовыя гарадскія ўлады. Частка людзей падала позву ў суд.
