33 прадстаўнікі медыя — менавіта столькі цяпер знаходзяцца ў зняволенні ў Беларусі. Гэта супрацоўнікі розных рэдакцый, якія да канца выконвалі свой прафесійны абавязак — расказвалі праўду пра падзеі ў Беларусі. 9 лютага лідарка дэмакратычных сіл Беларусі Святлана Ціханоўская заклікала ўвесь свет падтрымаць незалежныя СМІ і журналістаў у Міжнародны дзень салідарнасці з Беларуссю.

9 лютага споўнілася паўтара года мірнаму пратэсту супраць гвалту, беззаконня і дзяржаўнага тэрору ў Беларусі. Напярэдадні, 8 лютага, у Вільні амбасадары і спецыяльныя прадстаўнікі Літвы, Польшчы, Францыі, ЗША, Еўрасаюзу сустрэліся з прадстаўнікамі беларускіх няўрадавых арганізацый — Беларускай асацыяцыі журналістаў, Праваабарончага цэнтру «Вясна», Беларускага дому правоў чалавека, Беларускага Хельсінкскага камітэту, Фонду салідарнасці BYSOL — і абмеркавалі сытуацыю з правамі чалавека ў Беларусі.

З такім зваротам да беларусаў выступіла лідарка дэмакратычных сіл Святлана Ціханоўская:

—  9 лютага — паўтара года з кропкі незвароту, з моманту, калі беларусы вырашылі не маўчаць, а глядзяць праўдзе ў вочы. І гэтае 9 лютага мы прысвячаем тым, хто дапамагаў і дапамагае нам дамагчыся гэтай праўды — журналістам, блогерам і медыям. Дзякуй тым, хто аднаўляе працу рэдакцый і хто стварае персанальныя блогі. Дзякуй тым, хто задае мне нязручныя пытанні. Дзякуй тым, каму хапае энергіі ўзяць на сябе адказнасць за каманды. І дзякуй тым, хто заўважае, калі канчаюцца сілы, перадыхае і рухаецца далей.

Прадстаўнікі беларускіх медый у няволі

Кацярына Андрэева, журналістка тэлеканала «Белсат»
Дар’я Чульцова, журналістка тэлеканала «Белсат»
Ігар Лосік, кансультант «Радыё Свабода»
Сяргей Гардзіевіч, журналіст сайта «Першы Рэгіён»
Ксенія Луцкіна, былая журналістка «Беларусь 2»
Андрэй Аляксандраў, медыя-менеджар
Дзяніс Івашын, журналіст-фрылансер, «Новы Час», InformNapalm
Анджэй Пачобут, журналіст, член «Саюза палякаў у Беларусі»
Марына Золатава, галоўны рэдактар ТУТ.бай
Вольга Лойка, рэдактар ТУТ.бай
Людміла Чэкіна, генеральны дырэктар ТУТ.бай
Алена Талкачова, журналіст ТУТ.бай
Анжэла Асад, галоўны бухгалтар ТУТ.бай
Ірына Рыбалка, намеснік дырэктара ТУТ.бай
Ала Лапатка, галоўны інжынер ТУТ.бай
Дар’я Данілава, RocketData, TAM.BY
Марыя Новік, намеснік галоўнага бухгалтара ТУТ.бай
Аляксандр Дайнэка, намеснік дырэктара ТУТ.бай
Андрэей Аўдзееў, менеджар ТУТ.бай
Кацярына Ткачэнка, юрыст ТУТ.бай — хатні арышт
Ірына Касцючэнка, былая юрыстка ТУТ.бай — хатні арышт
Валерыя Касцюгова, рэдактар «Беларускага штогодніка», палітолаг
Аляксандр Івулін, журналіст Tribuna
Ягор Марціновіч, галоўны рэдактар «Нашай Нівы»
Андрэй Скурко, кіраўнік аддзела рэкламы і маркетынгу «Нашай Нівы»
Ірына Леўшына, дырэктар, галоўны рэдактар БелаПАН
Дзмітрый Наважылаў, экс-дырэктар БелаПАН
Генадзь Мажэйка, журналіст «Камсамолькай праўды ў Беларусі»
Ірына Слаўнікава, журналіст
Андрэй Кузнечык, фрылансер «Радыё Свабода»
Сяргей Сацук, галоўны рэдактар «Ежедневника»
Алег Груздзіловіч, журналіст «Радыё Свабода»
Уладзімір Грыдзін, фотажурналіст

Як падтрымаць журналістаў

Праваабарончы цэнтр «Вясна» расказвае, як сёння можна падтрымаць журналістаў, якія сёння знаходзяцца ў зняволенні:

1. Лісты салідарнасці — наймацнейшая падтрымка звонку. Падпісвайце паштоўкі, пішыце лісты і дасылайце словы падтрымкі прадстаўнікам медыя.

Адпраўляць лісты можна праз звычайную пошту, а таксама праз электронныя сэрвісы:

• Майстэрню паштовак салідарнасці
• ініцыятыву «Вклеточку»;
• письмо.бел

Таксама праваабаронцы прапануюць дасылаць палітвязням тэлеграмы. Гэта можна зрабіць на пошце або па нумары тэлефона 166 (толькі з гарадскога ў Беларусі) і надыктаваць тэкст. Не забывайце пакідаць сваё імя ў тэксце тэлеграмы.

2. Не менш значная падтрымка — распаўсюд інфармацыі. Распавядайце пра палітвязняў сваім блізкім, сябрам, калегам ды наўпрост у сацыяльных сетках. Так найбольшая колькасць людзей зможа даведацца пра гісторыі зняволеных і праявіць сваю салідарнасць з імі! Выкарыстоўвайце хэштэгі #FreedomLetters і #StandWithBelarus.

Толькі для тых, хто ўтрымліваецца ў СІЗА да суда:

3. Можна зрабіць грашовыя пераводы журналістам у следчыя ізалятары, каб яны змаглі сабе набыць, напрыклад, маркі, канверты і паштоўкі, каб адказаць на лісты салідарнасці і таксама павіншаваць сваіх блізкіх са святамі.

4. Даслаць пасылку ці бандэрольку з рознымі смачняшкамі і прыемнымі дробязямі. Гэта вялікая дапамога сем’ям вязняў і добрая падтрымка саміх зняволеных, асабліва ў святы. Калі ласка, не трэба адносіць палітвязням перадачы без узгаднення са сваякамі, бо ў СІЗА ўстаноўлены ліміт на перадачы па вазе — 30 кг на месяц. Пры гэтым пасылкі маюць абмежаванні толькі ад пошты — ў адной пасылцы можна адсылаць рэчаў да 50 кг за раз.

У бандэроль ці пасылку можна пакласці арэхі, курагу, фінікі, цукаты, цукеркі, зефір, мармелад, пасцілу, халву, шакалад, печыва, сухары, апельсіны, мандарыны, грушы, яблыкі, лімоны, каву любую, чай ліставы, суп, бульбу і макароны, вяленае мяса, каўбасу (сыравяленая, сыравэнджаная), салёнае сала, салёную рыбу, сыр, цыбулю рэпчатую, свежую зеляніну, часнок, агуркі, памідоры, перац, канверты, маркі, аркушы паперы, асадкі, фламастары, алоўкі, сшыткі, цыгарэты, запалкі ды іншае.